صحة أسرتك في رمضان- الجزء الأول

صحة أسرتك في رمضان

الجزء الأول

أهلا بيكم فى الأسبوع المخصص للإستعداد برمضان

هنتكلم فى الأسبوع ده عن الإستعداد الصحى لشهر رمضان

بالإضافة إلى الإستفادة من هذا الشهر العظيم من أجل الحصول على صحة أفضل

.

وزى ما عودتكم دايما كلامى كله بناء على دراسات و أبحاث حديثة و موثوق فيها بعيدا عن الإجتهادات و الفتاوى الشخصية.

.

وانهاردة فى بحث حديث جدا عايزة أشاركه معاكم وهو بيتكلم على فائدة نظام الصيام المتقطع على صحة القلب.

.

خلونى أفهمكم قصة الصيام المتقطع اللى أصبح منتشر حاليا

واللى بحب دايما أستخدمه فى الانظمة الغذائية لصحة أفضل مع عدد كبير من عملائى

.

ظهر حديثا نظام لتنظيم الطعام خلال اليوم يسمى بنظام الصيام المتقطع

والمقصود بيه الصيام لوقت طويل خلال اليوم , والإفطار لوقت قليل جدا

(طبعا ده نوع من أنواع الصيام المتقطع لأن النظام ده له أنواع كتيرة)

.

أنا حابة اتكلم معاكم عن النوع ده بالذات لانه أقرب ما يكون لنظام الصيام الإسلامى اننا بنصوم حوالى 16 ساعة و نفطر حوالى 8 ساعات وده اللى بيحصل فى نظام الصيام المتقطع اليومى مع اختلاف الجدول و مواعيد الصيام والإفطار

.

ايه لازمة الرغى ده كله بقى؟

لازمته انه ظهر مؤخرا دراسات كتيرة جدا بتثبت أهمية و فائدة الصيام المتقطع على صحة الجسم عموما ومنها الدراسة الحديثة ده اللى بتثبت تأثير و فايدة الصيام المتقطع على صحة القلب.

.

الدراسة تم إجراءها فى 2017 واكتشفت ان الإنسان الصحيح عموما أو مريض السكر خصوصا يمكنه وقاية قلبه من الأمراض المختلفة عن طريق اتباع نظام الصيام المتقطع

وده نتيجة لأن تقليل وقت الطعام على مدار اليوم بيؤدى إلى تقليل الإجهاد على القلب عن طريق انقاص الوزن و الوقاية من المشاكل الأيضية التى تحدث للإنسان بسبب الإفراط فى تناول الطعام.

.

يعنى نفهم من كدة , ان الصيام مفيد لصحة القلب فقط؟؟

لا طبعا

فى فوائد أخرى للصيام وهى كالتالى:-

1- راحة للجهاز الهضمى ,, الجهاز الهضمى بتاعنا أصبح شبه الماكينة اللى ما بتبطلش شغلالصيام هتكون فترة ممتازة له عشان يرتاح ويجدد خلاياه.

2-يقلل نسبة الكوليستيرول فى الدم : الدراسات الحديثة اثبتت ان معدل الكوليستيرول فى الدم بتكون أقل من وقت الإفطار , عشان كدة الإستمرار فى الصيام بشكل مستمر هيقلل فى العموم معدل الكوليستيرول فى الدم ويحمينا من مضاعفاته.

3-الدراسات اثبتت ان الصيام الإسلامى احسن من أى نظام غذائى , لأنه مرتبط بعقيدة دينية مش بوصفة طبيب , عشان كدة الجسم بيستجيب له جدا , ومش بيعانده , وفعلا اللى يستغل الصيام عشان يظبط وزنه هيحصل على نتيجة ممتازة جدا. 

(ولكن مع اتباع باقى التعليمات)

4-الانقطاع عن تناول الطعام لفترة بيعطى فرصة لخلايا الجسم لكى تتجدد باستمرار و تحافظ على صحتها , وتتخلص من الخلايا المريضة او الغير عادية , وهذا يساعد الجسم على التخلص من الخلايا السرطانية باستمرار.

5-راحة الجهاز الهضمى يجعل الدم يتدفق الى باقى خلايا الجسم بمنتهى البساطة , وأهمها خلايا المخ , مما يساعد على قوة التركيز والصفاء الذهنى و زيادة معدلات الذكاء

طيب و بعد ما عرفنا فوائد الصيام هل ده معناه ان مجرد ما صمنا فى وقت الصيام عن الطعام يبقى احنا ناكل اللى احنا عايزينه وقت الفطار عادى؟؟

ونحصل على كل الفوائد ده؟؟

.

أكيد لا طبعا

فعشان كدة انا انهردة هاقولكم على خطوات بسيطة تحافظوا عليها خلال يوم الصيام العادى سواء فى رمضان او حتى صيام النوافل فى رجب و شعبان عشان تستفيدوا صحيا جدا جدا من نظام الصيام الرائع الجميل.

.

1- تذكروا دائما ان الهدف من شهر رمضان او اى يوم صيام : 

هو العبادة فحاولى يكون تفكيرك متصل طول اليوم بالخشوع و الصلاة والدعاء

اللى كتير مننا مايعرفوش , ان الروح بتجوع زيها زى البطن بالظبط فاستغلى الشهر ده لاشباع روحك , وركزى على النقطة ده ,,أهم بكتير من اشباع بطنك.

طيب ليه انا بقولك كدة؟

لان جوع الروح بيسبب ليكى جوع فى كل حاجة جوع فى الاكل , جوع فى الشرب , جوع فى العاطفة , وجوع فى النشاط اشبعى روحك وقوى علاقتك مع ربنا سبحانه و تعالى , وخلى تركيزك عالأكل آآآآآخر همك فى هذا الشهر الكريم.

.

2-وقت الفطار :

 اشربى مية كتير طبعا احنا صايمين اكتر من نص اليوم بس ده مش معناه اننا بنقلل احتياجنا للماء بالعكس احتياجنا ثابت ,, فكونى حريصة انك تاخدى نفس احتياجات جسمك من الماء خلال فترة الإفطار طيب أعرف إزاى احتياجات جسمى من الماء؟؟؟ ادخلى على الموقع ده و دخلى بياناتك و هيحسبلك بالظبط انتى محتاجة تشربى كام كوباية فى اليوم.

https://www.medindia.net/patients/calculators/daily-water-requirement.asp

وده التطبيق الأول

.

3-امنعى السكر تماما من أكلك:

او قلليه بالتدريج مفيش فرصة أحسن من شهر رمضان عشان تكتسبى عادات صحية جديدة وأهم و أفضل عادة ممكن تكتسبيها هى انك تقطعى السكر من حياتك السكر مش بس بيسوس الأسنان , ويقلل مناعة الجسم , ويزود فرص الإصابة بالميكروبات المختلفة لا ده كمان بيزود نسب الإصابة بالسرطانات و يزود فرص الإصابة بأمراض القلب كمان فابدأى من بداية الشهر الكريم بأنك تقللى السكر بالتدريج لغاية ما تمنعيه تماما وخدى بالك بقى من كحك العيد , عشان مايبوظش كل اللى عملتيه من بداية الشهر.

4-شهر رمضان من الأشهر اللى وقت الأكل فيها بيكون بسيط جدا

عشان كدة , ده هيكون فرصة ممتازة انك تاكلى أكل نظيف يعنى ايه أكل نظيف او clean eating  يعنى تمنعى كل المواد المصنعة و الحافظة من أكلك الاضافات اللى بتتضاف على الأطعمة المصنعة ده عبارة عن سموم حتى لو مش بتموتنا مباشرة , فهى بتسبب موتنا على المدى البعيد فابدأى اتعودى تعملى أكلك فى البيت من البداية

بدون استخدام أى مواد مصنعة , وهتحسى بالفرق فى صحتك و صحة أسرتك على نهاية الشهر باذن الله.

.

5-زودى نسبة الخضروات و الفواكه فى أكلك

زى ما بقولها فى التحدى بتاعنا عيشى فريش زيادة نسبة الخضروات و الفواكه بيزود عندك فرص حصولك على الفيتامينات و المعادن المهمة بالإضافة إلى انه هيقلل كميات أكلك من النشويات والدهون ,, اللى بتسبب فى السمنة و زيادة الوزن بالتدريج طيب ازاى آكل فواكه و خضروات فى رمضان؟؟الوقت بيكون قليل جدا. فى طريقتين حلوين جدا , وثبتيهم معاكى كل يوم فى رمضان هتلاقى نفسك بتاخدى كمية خضروات و فواكه مهولة طول الشهر.

.

أولا : طبق السلطة

اول حاجة تخططيلها فى وجبة الإفطار و السحور هى : طبق السلطة

مش لازم بنفس المكونات اللى متعودين عليها ,, ممكن تغيرى و تطورى فيها

زودى او قللى ,, بس المهم طبق السلطة يكون منور فى سفرتك

ثانيا : السموزى

ايه رأيك فى رمضان السنة ده يكون المشروب الرسمى للعائلة هو السموزى

يعنى ايه سموزى ؟؟

يعنى خليط من الفواكه و الخضروات بالإضافة الى مواد غنية بالقيمة الغذائية

ممكن تفهمى أكتر عن السموزى فى البوست ده

https://www.facebook.com/osloop7ayah.health.wellness.coaching/photos/a.433009077112450.1073741831.111538349259526/434211263658898/?type=3&theater

.

التطبيق التانى انهاردة

اعملى طبق سلطة أو كوباية سموزى و صوريهم ونزلى الصور فى الكومنتات

.

6-اجابة السؤال المتعب, هنفطر ايه انهاردة؟؟

مهما كانت اجابتك ,, فلازم تبدأى الفطار بالشوربة الدافية الشوربة لازم تكون رقم 1 على سفرتك قبل اى نوع من انواع الأكل.

طيب ليه يعنى؟؟

معلش بقى , وسعولى بما انكم جيتوا فى ملعبى (الباطنة والجهاز الهضمى)

الشوربة اللى بتكون مصنوعة من شوربة الدجاج و اللحوم , بتحتوى على كمية بسيطة من الأحماض الأمينية المعدة اول ما بتشوف أحماض أمينية مفككة (مش معقدة زى اللى فى اللحوم نفسها وبتحتاج لهضم وتكسير). بتبدأ المعدة فى افراز هرمون الجاسترين

هرمون الجاسترين مسئول عن تشغيل ماكينة الهضم بالكامل بداية من الإنزيمات , الى العضلات اللاارادية و الى عمل الصمامات الموجودة فى أنبوبة الجهاز الهضمى يعنى الخلاصة ,, تناول الشوربة فى بداية الطعام تضمن لكى هضم صحى و امتصاص متكامل للعناصر الغذائية الموجودة فى الطعام.

.

7-طيب كلنا وفطرنا وصلينا نشرب ايه بقى؟؟

كوباية شاى ولا قهوة؟؟

غلط غلط غلط

الكافيين من اكتر اسباب فقدان المية فى الجسم بنسميه حرامى المية,

يعنى كل المية اللى انتى بتشربيها و تحافظى عليها فى فترة الإفطار , الكافيين ييجى بمنتهى البساطة يخرجها برة جسمك عن طريق البول ( أعزكم الله)

.

يعنى الشاى والقهوة مضرين؟؟

لا ابدا مش على الاطلاق لهم فوايد طبعا واهمها وجود مضادات الأكسدة و المحافظة على صحة الجهاز الهضمى وغيرها ولكن فى رمضان هيضرك جدا لأنه بيسبب العطش.

.

طيب أشرب ايه؟؟

ايه رأيك تجربى المشروبات الحلوة بتاعتنا بتاعة زمان الينسون , الكراوية , التيليو , البابونج , النعناع , القرفة , البردقوش , الكركديه , الزنجبيل ,,, وهكذا اعتبريها من ضمن العادات الصحية اللى هتحاولى تكتسبيها من خلال شهر رمضان وابدأى جربى أطعمة جديدة ومتنوعة , وحررى نفسك من سجن الشاى و القهوة اللى بقينا حابسين نفسنا وولادنا فيه.

.

8-صايمة وتعبانة ومحدش يكلمنى ,, هاقضى اليوم كله نوم

يا خبر

هو ربنا شرع لنا شهر رمضان عشان ننام فيه؟؟

ولا كتب علينا الصيام عشان نضيعه فى النوم ومانحسش بيه؟؟

.

أكيد غلط

قومى من بدرى

ومارسى يومك بشكل طبيعى

اخرجى وروحى شغلك , او شوفى شغل بيتك

والعبى رياضة كمان

ألعب رياضة فى رمضان

طبعا

الدراسات كلها اثبتت ان لعب الرياضة فى اثناء الجوع افضل بكتير من لعبها اثناء الشبع بس عشان ما ترهقيش نفسك خلى الرياضة قبل الفطار بساعة وتكون رياضة خفيفة برضه بس عموما هتحسى بفايدتها و نتيجتها على مدار الشهر لأنها هتساعدك تحرقى دهون الجسم كلها , وخصوصا العنيدة وتخليكى تستقبلى العيد بجسم أنبيق.

.

طبعا نصائحنا الصحية مش هتنتهى أبدا

ولكن ال8 خطوات دول بجد لو اتبعتيهم خلال شهر رمضان هتخرجى منه انسانة تانية

صحة أفضل و شكل أحلى و جسم أرشق , وكمان ذهن صافى و عقل مركز.

.

د/ سالي يوسف

https://www.ncbi.nlm.nih.gov/pubmed/26135345

https://www.diabetes.co.uk/news/2017/dec/new-study-examines-health-benefits-of-fasting-for-the-heart-98463634.html