إدارة المنزل 4: ميثاق المواعين_ الخطوط الحمراء.

السلام عليكم و رحمة الله و بركاته

تكلمنا في موضوعات سابقة عن:

إدارة المنزل 1: لماذا إدارة المنزل؟

إدارة المنزل 2: البؤرة المضيئة 

إدارة المنزل 3: جدول 5 * 5 

و اليوم نبدأ خطوة جديدة نحو سعينا للوصول بالأم المسلمة للاحتراف في إدارة بيتها.

يمكن العنوان غريب شوية لكن خليني أقولكم هنتكلم النهاردة عن ايه النهاردة

هنتكلم عن الخطوط الحمراء في التنظيم و التنظيف في المنزل

الفكرة هنا إننا لازم نعالج المشاكل الكبيرة اللي بتتعبك و بتفقدي السيطرة عليها بسهولة نظرا لأنك مش بتحبيها، مش متابعهاها أو مش حاطة لها قواعد و و خطة مدروسة للتغلب عليها.

خطوة 1 : الإستعانة بالله و استحضار النوايا ( راجعي مقالنا الأول إدارة المنزل 1: لماذا إدارة المنزل؟  )

خطوة 2: حددي و اكتبي في ورقة أهم 3 حاجات هتخليهم خط أحمر لمدة معينة لحد ما يتضبطوا.

طبعا عددهم دا مجرد اقتراح. أقل أو اكتر حسب رغبتك و قدرتك المهم متضغطيش على نفسك لأنك كل فترة ممكن تحطي خطوط حمراء جديدة لما تكوني تخطيتي اللى قبلها.

طب أعرف الحاجات دي ازاي... هاقولك:

1- هي غالبا حاجة بتشيلي هم إنك تخلصيها.

2- بتحاولي تهربي منها دائما.

3- نفسيتك بتبقى في السما لما تبقى خلصانة.

4- عندك استعداد تشتري أي اختراع يعملهالك لوحده :D 

و يمكن أنا في العنوان حطيت المواعين كمثال مش أكتر رغم إنه مش مشكلة للبعض و لكن مشكلة للكثيرات... خصوصا لما تسمعي جمل عنها زي 

" المواعين لا تفنى و تستحدث من العدم" - " نفسي أعرف فين الخرم اللى بتطلع منه المواعين و انا أسده"  :D 

و غيرها من إبداعات الأمهات المكافحات :D و البنات و الله " ماما مخلفاني علشان اغسلها المواعين" :D

خطوة 3: حددي أسباب المشاكل.

في الخطوة دي هتقعدي مع نفسك كدة و تحددي أسباب المشكلة الأساسية

1- ليه مش بحب الحاجة دي.

2- ليه دائما النظام فيها بيبوظ مني.

3- ايه الأضرار اللى بتعود عليا من عدم تنظيمي للحاجة دي.

و ناخد مثال على المواعين ( أنا بحب المواعين_ سامحني يا رب).

أنا بكرهها علشان:  دا كورس مكثف كل البنات بتاخده و شعور الأمهات بتوصله للبنات لما تعمل كل حاجة و تسيب لهم المواعين. المواعين أصلا حلوة.

النظام دائما بيبوظ مني فيها علشان مش بلحقها أول بأول فبتتكوم عليا فبكسل أكتر عليها فبتزيد فبكسل فبتزيد فبكسل..... 

المواعين بتنشف لما بسيبها فبتحتاج مجهود أكبر فبسيبها.

و من هنا أحب أقولكم مثل سمعته عجبني " المواعين و هي لينة هينة" :D 

خطوة 4: ميثاق_ خط أحمر

1-  هتحطي لنفسك قواعد و حلول للمشاكل اللى فوق دي و تلتزمي بيها علشان تتخطي المشكلة.

2- مش بس كدة أنتي هتكتبيها( على إيديك- تطبعيها- ألوان- أبيض و أسود) أي حاجة انتي بس اكتبيها :) 

3- هتعلقيها في المكان اللي يخص المشكلة دي.( فوق حوض المواعين مثلا :D ).

4- أرسمي فيها خط أحمر أو برواز بالأحمر او دائرة حمراء علشان تنبهك دائما للي مكتوب و إنك عاهدتي نفسك على إنك تمشي على القواعد دي لحد لما تبقى جزء من عاداتك اليومية ( أنا رسمت الدايرة فاضية علشان باطبع أبيض و أسود و بعد الطباعة تتلون أحمر علشان متتطبعش سودا لو لونتها أحمر من دلوقتي).

و دي أمثلة لعلها تساعدكم 

خطوة 5 : الإلتزام و الاستمرار.

استعيني بالله و استمري فترة على القواعد دي:

•  فكري نفسك دايما بالنوايا اللى اتحسبتيها.
• فكري نفسك دايما قد ايه إن شاء الله هتكوني مستريحة و مبسوطة لما تلتزمي بالقواعد دي.
• قد ايه هتوفري وقت و جهد على المدى البعيد.
•  قد ايه هتكوني مستريحة نفسيا. 
• قد ايه هتكوني مديرة منزل شاطرة بإذن الله.

خطوة 6: كوني البؤرة المضيئة ( راجعي مقالنا السابق إدارة المنزل 2: البؤرة المضيئة  )

في انتظار التطبيقات :) راسلونا على صفحتنا على الفيس بوك :)

أستاذة و مديرة منزل

انتظرونا في تدوينات أخرى مع أفكار و جداول تانية كتير اسأل الله ان ينفعكم بها.

في انتظار أي استفسار أو اقتراح أو فكرة :) 

و في الختام...

يمكن الفكرة بسيطة و لكن...

أرجو عدم نقل مضمون الموضوع و لكن يمكنكم نشر الرابط الخاص به

جميع ما ورد بهذا الموضوع هو للإستخدام الشخصي و لا أبيح اقتباسه في أي عمل تجاري أو ربحي

و دمتم بخير :)

إسراء زين 

إدارة المنزل 3: جدول 5 * 5

السلام عليكم و رحمة الله و بركاته

المقال الأول: إدارة المنزل 1: لماذا إدارة المنزل؟

المقال الثاني: إدارة المنزل 2: البؤرة المضيئة 

النهاردة هنبدأ نضع أساس لحاجات كتير عملية هنشرحها في الدروس القادمة من سلسلة إدارة المنزل.

فكرة 5 * 5 أبتكرتها لأكتر من سبب و بتخدم جداول تنظيمية كتير سواء في قسم التنظيم أو التنظيف أو قسم الميزانية.

و مش مطلوب منكم إنكم تتخيلوا كل شئ هتفيدنا بيه الفكرة دي لكن كان لازم ابدأ بشرحها قبل أي جداول أخرى علشان لما أذكرها في المواضيع القادمة تكون واضحة.

الفكرة بتقول إن الشهر بيكون 5 أسابيع و كل أسبوع بيبقى 5 أيام  

عروستي :D 

طيب خلينا نشرح ببساطة الفكرة دي و ندي أمثلة عليها و نقول أسباب ذلك.

و دايما حطوا في بالكم إن دي مجرد أفكار يا إما هتعجبك زي ما هي و تساعدك أو تاخديها و تعدلي عليها و تبقى فتحت قدامك أفكار أخرى تكون انسب ليكي.

ال5 الأولى ---ّ->  5 أيام في الأسبوع: 

و دا معناه إن في حاجات في جداولنا التنظيمية بنوزعها على 5 أيام فقط في الأسبوع زي شغل البيت الأسبوعي و الشهري و دا هنشرحه بالتفصيل في مواضيع مستقلة.

بس دا معناه إنك بتختاري يومين في الأسبوع بيكونوا اجازة من الشغل دا إلا من الحاجات اليومية الأساسية اللى مفيش غنى عنها و بتوزعي باقي شغل على 5 أيام فقط.

ال5 الثانية ---ّ->  5 أسابيع في الشهر: 

هنا الجزء دا فيه نقطتين:

1-  إننا بنتعامل مع الشهر على إنه 5 أسابيع مش 4 أسابيع و نص ( 30 يوم) و النقطة دي بالذات محاجة شرح مخصوص في تدوينة لوحدها لأني دي من اكتر النقط اللى بعيد شرحها في الكورس كتير :D فهجهزلكم لها  تدوينة مستقلة مدعومة برسومات تشرحها كويس و بتفيدنا بشكل كبير في قسم الميزانية... اللى تقدر تطبقها بتقدر توفر مصروف شهرين كاملين على مدار السنة... ازاي... تابعوانا علشان تعرفوا :)... حتة تشويق :D 

2- الجزء الثاني إننا لما بنوزع شغل التنظيف و التنظيم الشهري بنوزعه على 4 أسابيع فقط من ال5 أسابيع بتوع الشهر بتاعنا. و دا بنفس فكرة 5 أيام فقط في الأسبوع فبرضه 4 أسابيع فقط في الشهر سواء بقى طبقتي فكرة الشهر 5 أسابيع أو مشيتي على الشهر العادي.

لمااااااااااااذا :

ليه وجع القلب دا طيب :D 

هقولكم بعض الأسباب اللى بتخلي الفكرة دي مفيدة من وجهة نظري.

1- إن دا بيديكي مرونة في وضع جدولك الأسبوعي و الشهري لأن دايما عندك مساحة فاضية تعوضي فيها أي تقصير.

2- إنك من حقك تكافأي نفسك بأيام راحة لو مشيتي على جدولك بشكل كامل.

3- إنك بتقدري تحركي اليومين دول براحتك لو حصلت لك أي ظروف: خرجت، تعبانة أو غيرها. فتاخدي اليومين اللى يعجبوكي و انتي مستريحة لأنك عارفة إنك هتقدري ترحلي الشغل بتاعهم على يومين غيرهم و نفس الفكرة في الأسبوع الخامس في الشهر لو هتسافري أو عندك امتحانات أو غيره.

4- إحساسك إن في مساحة و وقت شخصي ليكي تقدري تتفرغي فيه لعباداتك و هواياتك و تحقيق اهدافك هيخليكي تبدأي أسبوعك الجديد و انتي مبسوطة.

5- بيكون عندك مساحة تراجعي و تقيمي شغلك و جدولك اللى فات و تحطي جدولك الجديد و تعدلي عليه تبعا لتقييمك.

انتظرونا في تدوينات أخرى مع أفكار و جداول تانية كتير اسأل الله ان ينفعكم بها.

في انتظار أي استفسار أو اقتراح أو فكرة :) 

و في الختام...

يمكن الفكرة بسيطة و لكن...

أرجو عدم نقل مضمون الموضوع و لكن يمكنكم نشر الرابط الخاص به

جميع ما ورد بهذا الموضوع هو للإستخدام الشخصي و لا أبيح اقتباسه في أي عمل تجاري أو ربحي

و دمتم بخير :)

إسراء زين 

الأم المبدعة سالي منصور: أنشطة لتعليم الأرقام ( الاسم و الرسم و الدلالة العددية )

السلام عليكم و رحمة الله و بركاته 

تقدم لنا اليوم الأم المبدعة سالي منصور  مجموعة من الأنشطة التي صممتها 

بنفسها ضمن أنشطة تعليم الأرقام باللغة الإنجليزية لابنتها الجميلة حلا

و نترك لها الحديث :)

--------------------------------------

الهدف من الأنشطة: 

معرفة شكل الرقم ومعرفة القيمة العددية الخاصة بالرقم 

1-  نشاط مطابقة الرقم مع القيمة العددية

الأدوات:

1- لعبة XO قمت بكتابة الأرقام عليها و يمكن استبدالها بتصميم المربعات و رسمها بمنتهى السهولة باستخدام قلم و مسطرة و كتابة الأرقام بداخلها.

2- فوم مضغوط.

3- مقص.

4- يمكن استخدام خرامة لعمل الثقوب داخل الدوائر.

5- برجل أو شئ دائري لرسم الدوائر و قصها.

طريقة تنفيذه: 

1- لعبة XO قمت بكتابة الأرقام عليها و يمكن استبدالها بتصميم المربعات و رسمها بمنتهى السهولة باستخدام قلم و مسطرة و كتابة الأرقام بداخلها.

2- نقوم برسم دوائر على الفوم المضغوط و نقوم بقصها لصنع الدوار الوردية في الصورة.

3- باستخدام المقص أو الخرامة نقوم بعمل ثقوب داخل الدوائر يختلف عددها كل مرة حسب الأرقام المراد مطابقتها.

طريقة تقديمه للطفل :

 يعتمد هذا النشاط على التدريب على معرفة الدلالة العددية للرقم و مطابقة الطفل للدلالة العددية مع الرقم.

1- نقوم باختيار دائرة منهم و نقوم بعد الثقوب الموجودة داخلها.

2- نقوم بوضعها على الرقم المناسب لها على اللوحة.

3- نترك الطفل يكمل بقية الدوائر أو نساعده لآخر النشاط و ذلك حسب مستوى الطفل و مدى تقدمه في القدرة على العد و حفظ الأرقام رسما و اسما.

1-  نشاط مطابقة شكل الرقم و تعليم العد و الدلالة العددية 

الأدوات:

1- ورقة بيضاء.

2- 2 طبق صغير.

3- ورق ملون.

4- مقص.

طريقة تنفيذه: 

1- نقوم بتقسيم الورقة البيضاء كما بالرسم و رسم الأرقام على الصف العلوي.

2- نقوم بقص الأرقام من الورق الملون و تكون بنفس مقاس الأرقام المرسومة على الورقة البيضاء و وضعها في طبق صغير.

3- نقوم بقص أشكال صغيرة مربعات مثلا تكفى لعدد الأرقام المكتوبة ( نحتاج هنا 15 مربع على الأقل و هكذا). و نضعهم في الطبق.

طريقة تقديمه للطفل :

1- يبدأ الطفل أولا بمطابقة الرقم المقصوص من الورق الملون مع الشكل المناسب له على الورقة البيضاء و نسأل الطفل عن اسم الرقم او نذكر له اسمه إن كان لم يحفظهم بعد.

2- نقوم بعد ذلك بإخراج عدد مناسب من المربعات لكل رقم و وضعه عند الرقم.

-------------------------------- 

نصيحة: يمكن اولا أن يقوم الطفل بعد المربعات كلها في يديه ثم يضعها على الورقة ليشعر بفرق الكمية بين كل رقم و الآخر

فمثلا نقول 1------ نضع مربع واحد في يديه ثم نضعه على الورقة

نقول       2------ نضع مربعين في يديه و بعدها يضعها على الورقة البيضاء و هكذا.

و يكون افضل إن استخدمنا شئ اثقل من الورق كالمكعبات و الخرز ليشعر بفرق الكمية بين الأرقام في كل مرة.

اسأل الله  أن ينفعكم بما قدمته و في انتظار تجارب أخرى لأمهات مبدعات إيجابيات... :) 

إسراء زين 

إدارة المنزل 2: البؤرة المضيئة

السلام عليكم و رحمة الله و بركاته 

المقال الأول: إدارة المنزل 1: لماذا إدارة المنزل ؟

البؤرة المضيئة...

كنت قد سمعت هذا المصطلح في أيام دراستي بالجامعة، كانت فكرة تتطبقها إحدى الأنشطة الطلابية لتطوير المناطق العشوائية و ذلك بالاهتمام بأسرة معينة من جميع النواحي و تطوير جميع أفرادها لتكون بؤرة مضيئة لمن حولها من الأسر. فما معني ذلك و كيف نريد تطبيقه على ما سوف ننفذه في رحلتنا في إدارة المنزل؟


اليوم سأترك الصور التي صممتها لكم تتحدث بدلا عني لأنها توضح الفكرة بشكل أعمق.
ثم سنتحدث لماذا افعل ذلك من الأساس.

سنتصور أن كل واحدة منا هي الفرد الواقف في منتصف الدائرة المكتوب فيها " أنت" و حولك دائرة حمراء وهي دائرة علاقاتك و معارفك. 
و الدائرة الخضراء هي معارف معارفك و هكذا.

و لكن ألم تلاحظي شيئا ما؟
ألم تلاحظي تلك الخلفية السوداء... و لكن لماذا جعلتها سوداء؟

لقد جعلتها سوداء لنفترض من خلال ذلك أن وضع أمتنا في أسوأ حالاته و نرى كيف نستطيع تغييره بفكرتنا هذه.


عندما تتعلمين و تكوني مجتهدة فيما تعلمتيه ستكوني مشعة بنور علمك و عملك. 

و لكن هل هذا ما نريده؟ بالطبع لا 
و لكننا نريد منك نقل خبراتك و علمك لمن حولك و تشجيعهم على العلم و العمل ليشعوا مثلك فتكوني وقتها بؤرة مضيئة خلقت حولها التغيير و التجديد.

ثم علميهم أن يكونوا هم أيضا بؤر مضيئة لمن حولهم حتى تستمر السلسلة و يشع نور العلم و العمل حولنا.

فيشع من حولهم بدورهم و نظل في هذه السلسلة من العلم و العمل حتى يضئ واقع أمتنا.

و هذا لا ينطبق فقط على ما سنتعلمه في فنون إدارة المنزل
و لكن 
كوني بؤرة مضيئة بأخلاقك
كوني بؤرة مضيئة في تربية أبنائك
كوني بؤرة مضيئة في علمك و اجتهادك
كوني بؤرة مضيئة تعلم غيرها كيف تكون بؤرة مضيئة مثلها
كوني بؤرة مضيئة...

ألقاكم على خير في المقال القادم حيث سنبدأ أولى خطوات التنفيذ العملي لإدارة المنزل
في رعاية الله 

إسراء زين 

إدارة المنزل 1 : لماذا إدارة المنزل ؟

السلام عليكم و رحمة الله و بركاته 

أهلا بكم في مقالنا الأول في سلسلة إدارة المنزل،

سوف نبحر معا في هذه السلسلة في بحر ممتع من الأفكار و الأنظمة الفعالة في إدارة المنزل من حيث التنظيم و التنظيف و إدارة الوقت و الموارد المالية.



و لكن قبل أن نبدأ... لماذا إدارة المنزل؟ 


ليس الهدف من هذه السلسلة التركيز على إدارة المنزل كهدف و لكن كوسيلة... نعم وسيلة لتنظيم الحياة و الوقت حتى تتفرغ المرأة المسلمة للإلتزامات الدينية و الشخصية و الإجتماعية و غيرها سواءا كانت زوجة او أم أو فتاة أو معلمة أو غير ذلك.

فدور المرأة في المجتمع أكبر بكثير من إدارة الشئون المادية في المنزل من تنظيف و طعام و غيره... فدورها الأساسي و المهم هو إعداد الأجيال و تربية الأبناء الصالحين النافعين في المجتمع و لكنه ليس الوحيد فأين نذهب من دون طبيبة مسلمة أو معلمة متقنة و غيرها من الأدوار المهمة في بناء مجتمعنا المسلم و نهضة أمتنا.

و لن يتحقق لها صفاء الذهن و هدوء البال و التركيز على الهدف قبل أن تطمئن على إنجاو واجباتها و تنظيم حياتها و حياة من هي مسئولة عنهم... و هنا يأتي دورنا في هذه السلسلة :) 

نريد صنع امرأة واعية سلاحها العلم و العمل و لن يتحقق لها ذلك قبل أن تتخلص من عبء الإنتهاء من واجباتها تجاه الآخرين و أحد هذه الواجبات و هو من أهمها هو إدارة شئون بيتها و الذي سيكون ممتع إن شاء الله.

و نهمس إليك همسة قبل أن نذهب " افخري بلقب ربة منزل" سواءا كنتي امرأة عاملة أو لا، زوجة أو فتاة ، فهدم الأسرة يبدأ من تغييب دور الأم الراعية لتلك الأسرة و بهذا تُهدم الحضارات و الأمم.

و لا ننسى قبل أن نبدأ رحلتنا أن نحتسب نوايانا في هذا العمل، احتسبوا حفظ الرعية... احتسبوا حسن التبعل... احتسبوا بر الوالدين... ماذا احتسبتي أيضا ؟ شاركينا 


انتظرونا في مقالنا القادم بعنوان" البؤرة المضيئة"

في أمان الله

إسراء زين

الأم المبدعة رنا سمير: أنشطة لتعليم الأرقام ( 1-5) باللغة الإنجليزية

السلام عليكم و رحمة الله و بركاته 

تقدم لنا اليوم الأم المبدعة رنا سمير مجموعة من الأنشطة التي صممتها بنفسها ضمن أنشطة تعليم الأرقام (1-5) باللغة الإنجليزية لابنها الجميل آسر

و نترك لها الحديث :)

--------------------------------------

الهدف من الأنشطة: 

معرفة شكل الرقم ومعرفة القيمة العددية الخاصة بالرقم 

1-  نشاط تطابق الأرقام

الأدوات:

1- ورقة A4 بيضاء.

2- قلم مناسب للرسم و الكتابة بخط واضح.

3- صمغ.

4- كرتونة مناسبة لحجم الورقة.

5- ورق مقوى لتصميم الدوائر المتحركة.

6- مقص.

طريقة تنفيذة : 

1- استخدمت ورقة a4  أبيض وقمت بالرسم عليها وكتابة الارقام في الدوائر بجسم الدودة.

2- قمت بلصق الورقة على قطعة كرتون للمتانة و التقوية.

3- قمت بقص دوائر مماثلة لدوائر جسم الدودة من الورق المقوى و كتابة الارقام عليها ثم تثبيتها على الكرتون . 

طريقة تقديمه للطفل :

1- نضع اللوحة أمام الطفل.

2- ننطق كل رقم على حدى اولا.

3- ثم ننطق الأرقام الموجودة على الدوائر و نطابقها مع الأرقام على جسم الدودة.

4- ثم نترك الطفل بمفرده لتنفيذ النشاط مع سؤاله عن اسم الرقم.

2- نشاط معرفة القيمة العددية للأرقام:-

الأدوات:

1- ورق أبيض.

2- كرتون.

3- صمغ.

4- مقص.

5- كرات قطن لاستخدامها في العد( و يمكن استبدالها بأزار أو أي شئ جذاب للطفل).

طريقة تنفيذة :

1- نقص كروت متطابقة فى الأبعاد من الورق الأبيض.

2- نقوم بكتابة الأرقام عليها  ورسم دوائر تمثل القيمة العددية الخاصة بكل رقم.

3-  ثم نلصقها على الكرتون للتقوية والتثبيت.

4- و نستخدم كرات القطن للعد أثناء تنفيذ النشاط مع الطفل.

طريقة تقديمه للطفل :

1- احضار كل كارت وقراءة الرقم أمام االطفل والاشارة الى القيمة العددية التي تمثل الرقم.

2- نقوم بتمثيل القيمة العددية  بالكرات بوضعها فوق الدوائر المرسومة على الكارت

3- نكرر بالمثل مع كل رقم. 

4- نقوم بتجميع الكرات مرة اخرى ونجعل الطفل يمسك كل كارت ويقرأ الرقم ثم يضع عدد الكرات المماثلة أمام الرقم.

3-  نشاط معرفة القيمة العددية للأرقام والتطابق:-

الأدوات المستخدمة:

1- كروت تعليمية عن الأرقام و القيمة العددية الخاصة بها.

2- أرقام فوم حجم كبير.

بيتم شرائهم مع اى مكتبة

طريقة تقديمه للطفل :

1- نقوم بتعريف الطفل على الارقام الفوم  بذكر اسم الرقم.

2- نسأله عن اسم الأرقام و نطلب منه الإشارة إليها.

3- ننتقل إلى الكروت و نقوم بعد الرسومات الموجودة عليها ومعرفة الرقم.

4- ثم نقوم بالمطابقة بين الكارت والرقم المصنوع من الفوم.

رنا سمير

-----------------------------  

اسأل الله  أن ينفعكم بما قدمته و في انتظار تجارب أخرى لأمهات مبدعات إيجابيات... :) 

إسراء زين 

كتاب الانشطة التفاعلية للأرقام من 1 إلى 10 باللغة العربية

السلام عليكم و رحمة الله و بركاته

النهاردة هعرض لكم كتاب الأنشطة التفاعلية للأرقام من 1 إلى 10 باللغة العربية 

هنتعرف على هدفه، طريقة تنفيذه و طريقة تقديمه للطفل

أهداف النشاط

1- التعرف على أسماء الأرقام من 1 لـ 10 باللغة العربية بتكرار اللعب في الكتاب.

2- التعرف على رسم و شكل الأرقام من 1 لـ 10 باللغة العربية بتكرار اللعب في الكتاب.

3- التعرف على الدلالة العددية للأرقام من خلال فك و تركيب الأشكال في صفحة كل رقم و عدها اثناء الفك و التركيب.

4- مدخل غير مباشر للأطفال عن الأشكال المختلفة( هنتعرف ازاي... :)  )

طريقة تنفيذ النشاط

صورة عامة على الكتاب قبل البدء:

اتفرجوا على الكتاب كاملا في الفيديو التالي قبل ما نبدأ شرحه... 

الأدوات المستخدمة:

1- قماش جوخ ألوان مختلفة: ممكن تشتروه بالمتر و ممكن تشتروا مجموعة فيها 10 أو 12 لون مختلفين مقاش A4 اللى هو مقاس الورقة الفلوسكاب كدة و دا اللى انا استخدمته و كنت جايباه من مكتبة كاميرا 9 اللى عند كلية رياض الأطفال قريب من محطة مترو البحوث أو عند أي مكتبات كبيرة زي سمير و علي و غيرها.

2- مقص.

3- مسدس شمع( أفضل من الصمغ علشان كتر الفك و التركيب في الأشكال داخل الكتاب).

4- خرامة.

5- شريط ستان.

6- شريط من اللزق اللى من جزئين انا مش عارفة اسمه بس اللى هو بلزق بيه الأشكال عند كل رقم في الفيديو هتلاقوه بيتباع بالمتر في المكتبات زي كاميرا 9 و رخيص مش غالي.

7- خرز علشان الصفحة الأخيرة( أنا استخدمت أسورة كانت اتقطعت عندي فممكن تشتروا اي عقد او اسورة وتاخدوا الخرز بتاعها لو مش متاح تشتروا خرز).

8- خيط قوي علشان الخرز.

طريقة تجهيز الصفحات:

انا اخترت إني اعمل صفحات الكتاب نص مقاس الصفحة الA4 لأن دي أول مرة أجرب لكن ممكن تعمليها أكبر خصوصا إن دا ممكن يديكي مساحة اكبر للشغل و كمان ممكن تعملي الأرقام أكبر و دا أفضل للأطفال.

و كمان ممكن تخلي كل الصفحات بلون واحد أو الوان مختلفة. انا عملتها بألوان مختلفة من باب الجذب و كمان لأن الالوان عندي مكنتش هتقضي.

اخترت لون الغلاف( أحمر) و قسمته و عملت منه آخر و أول صفحة ثم عملت بقية الصفحات بالداخل كل واحدة لون.

بعد كدة خرمت كل الصفحات علشان اربطهم ببعض بشريط الستان لما اخلص علشان تكون جاهزة و مخرمش بعد ما اكون لزقت بقية الشغل.

غلطة مهمة عملتها: خرمت الصفحات و اشتغلت على إنها كتاب انجليش فخرمت كله شمال و طبعا اضطريت اعدلها بعد ما كنت خلصت فخلوا بالكم إننا شغالين هنا على الأرقام العربي فخلوه يفتح عربي علشان حتى الطفل يتعلم الاتجاه الصح.

  

طريقة تنفيذ صفحة الغلاف:

صفحة الغلاف بسيطة جدا

1- ضبطوا المقاس بتاع المستطيلات المتحركة علشان تقضي 9  منها و طبعا تختاروا الألوان اللى تحبوها.

2- قصوا الأرقام و انا هنا اشتغلت كل الكتاب بالأرقام باللون الأسود علشان يكون واضح وسط الألوان الأخرى علشان عايزة أركز على شكلها علشان ينطبع في ذهن الطفل.

3- هتلزقوا الأرقام على المربعات ثم تلزقوا المربعات من فوق فقط علشان تكون بالشكل اللي في الفيديو.

4- ممكن بقى تعملوا بالخرامة دوائر صغيرة أو مربعات و تلزقوا تحت كل رقم العدد الخاص بيه.

طريقة تنفيذ صفحات الكتاب:

1- ابدأوا بقص الأرقام كلها بمقاس مناسب ممكن تكتبوها بإيديكم أو تطبعوها و تقصوها.

2- ألزقوا الارقام في الصفحات كلها علشان لما تبدأوا تقصوا الأشكال تقدروا المساحة المتبقية.

3- هتبدأوا تقصوا الأشكال الخاصة بكل رقم و ممكن تطبعوها و تقصوها و بعدين تحطوها فوق قماش الخوج و تقصوا علشان تكون مضبوطة.

أنا طبعت الورقة دي مرة كبيرة و مرة صغيرة علشان لما هتوصلوا للعشرة مثلا لازم تبقى الأشكال أصغر علشان عددها اكبر.

و دا الجزء اللى بنقدم فيه الأشكال بشكل غير مباشر لما نقول كام دائرة هنا و كام مربع هنا.

4- هتحددوا الأشكال و حجمها و تقصوها بالعدد المطلوب و ممكن طبعا بألوان مختلفة.

5- تبدأوا  تقصوا الجزئين بتاع شريط اللزق الأبيض و تلزقوا جزء على الشكل و جزء في الكتاب علشان الطفل يشيله و يلزقه تاني( انا جربت الصمغ بس اتفك لما بدأت اجرب أشيله و أحطه فاستخدمت مسدس الشمع فنصيحة استخدموه من البداية).

طريقة تنفيذ صفحة الخرز:

طبعا بعد ما عملتها حسيت إنها كانت محتاجة مساحة اكبر شوية أو تتقسم على صفحتين حسب طفلك هيفضل و يركز في ايه خصوصا إني اضطريت اعمل الأرقام صغيرة جدا.

1- جهزوا الخرز في الخيط القوي و اضبطوا طوله بحيث تسيبوا مكان للأرقام و اعملوا حساب إننا هنلزق و نعمل عقدة آخر الخيط لو تحبوا.

  

2- اول واحد جربتوا عملت ال10 علشان أعرض واحد و سيبوا مكان للخرز يروح و يجي علشان تقدروا تعدوه و عملت عقدة و لزقتهم بس بعد كدة لاقيت انه مش لازم لزقت الباقي عالطول و حطيت مباشرة المربعات الزرقاء من ورق الفوم اللى في الشكل النهائي بس المهم تحطوا كمية شمع كويسة علشان الخيط يلزق كويس جدا.

3- و بعد كدة كملوا بقية شرايط الخرز و الأرقام و غطوه آخر و اول الخيط بمربعات ملونة.

طريقة تقديم النشاط للطفل

طريقة تقديم صفحة الغلاف:

1- هنقول للطفل دا رقم كام طب تيجي نعد جواه كام علشان نعرف.
2- المربعات أنا رصاها بشكل يخدم نشاط الزوجي و الفردي قدام شوية طبعا مش دلوقتي خالص لكن مجرد ترك صورة ذهنية في دماغه عن الرصة.
3- بعد ما نعد النقط جوا نشاور على الرقم و نكرر له اسمه علشان يركز اللى احنا بنقوله دا اسم انهي شكل فيهم.

طريقة تقديم صفحات الكتاب:

1- كل صفحة هنقدم الرقم و نشاور عليه و ممكن جدا تتعودوا تشاورا عليه بنفس طريقة كتابته يعني تمشوا على الرقم كأنكم بتكتبوه علشان هيخدمكم بعد كدة في مرحلة الكتابة إن شاء الله.
2- نبدأ نعد الاشكال الموجودة.
3- و نفكها و نعدها و احنا بنفك.
4- نرجع نلزقها و نعدها و احنا بنلزق.
5- و نعد تاني بعد ما نلزق.
6- و نشاور تاني على الرقم و نكرر و نأكد على اسمه زي رقم 1.

مش لازم كل دا طبعا دي الافكار كلها اللى في بالي لكن الطفل هو اللى هيحكمك أعرضي عليه و سيبيه براحته خصوصا إن السن دا وقت تركيزه قليل و بيزهقوا بسرعة ممكن يعد فقط ممكن يشيل و يلزق فقط براحته.

طريقة تنفيذ صفحة الخرز:

1- هنقوله يلا نعد نشوف فيه كام خرزة.
2- نعد الخرز و نقول طلع كام و نشاور على الرقم المكافئ و نكرره بالشكل اللى تشوفوه مناسب للطفل.

ملاحظات عامة 

1- في البداية هتلاقوا بقهم(الفم يعني :D ) بيعد و شغال لوحده خصوصا لو هما حافظين العد من قبل كدة( حفظ فقط) ملوش علاقة بالأشكال اللى بنشاور عليها ابطأ أو أسرع فدي حاولوا تضبطوها بالتكرار و شاوروا و وروهم بتعدوا ازاي و اكدوا اننا بننطق الرقم بعد ما بنشاور أو نلزق أو نشيل.

2- ممكن في كل مرة تستخدموا أسلوب الدرس الثلاثي في تقديم شكل الرقم مع اسمه

ستجدوا شرحها في هذا الموضوع ( هحط اللينك أول ما اجهز الموضوع إن شاء الله).

كلام مهم جدا في النهاية... قصدي البداية :)

1- مش في يوم و ليلة هتلاقي الطفل تقبل الأنشطة و قاعد و مركز و مستمتع المهم تبدأي و تعملي أقصى طاقتك و ربنا إن شاء الله هيوفقك.

2- كفاية قراءة في المدونات و يلا إلى التنفيذ بالمتاح عندك.

3- مش مهم تنفيذ النشاط زي ما هو المهم إنك توصلي للهدف المرجو بالطريقة المناسبة لطفلك.

4- أي واحدة بتنفذ و محتاجة استفسار هكون سعيدة بتلقي استفسارتكم طبعا.

5- أي أم هتنفذ هنعرض شغلها على المدونة و على الصفحة.

6- كلنا عندنا مشاكل و لغبطة في حياتنا و مش دايما الخطط التعليمية بتضبط معانا و بنقوم و نقع المهم تفضلي على الطريق و متلفيش و ترجعي علشان متفتكريش إننا من كوكب آخر المهم إن خطة ابنك التعليمية تكون ضرورة في حياتك مش شئ كمالي.

يلا ورونا الهمة يا بنااااااااااااااااااات :) 

في أمان الله.

إسراء زين