توفير الوقت في رمضان

توفير الوقت في رمضان

أغلى ما في رمضان هو الوقت... علشان كدة عايزين نقول شوية أفكار هتساعدنا نوفر وقت قدر الإمكان في رمضان... يمكن بعضكم يعرفها بس خلينا نفتكرها و مش بس كدة كمان ننفذها :)


أولا البيت بشكل عام:

تنظيف البيت بشكل عميق و جيد بيساعدك تحافظي على الشقة نظيفة و مرتبة لمدة طويلة مع الحاجة لقليل من التنظيم و العناية... و كمان علشان منضيعش وقت ترتيب و تنظيف في رمضان أو قبل العيد... رمضان للعبادة... و العيد للفرحة و السعادة... مش للتنظيف... علشان كدة نصيحتي الأولى إنك قبل دخول رمضان ترتبي البيت و تنظفيه بشكل جيد جدا قدر الإمكان علشان توفري وقتك و جهدك في رمضان... من غير ما تنسي تستعدي للعبادة في شعبان برضه طبعا :) 


ثانيا الطعام:

طبعا الموضوعات اللي بتتكلم عن طريقة إعداد الطعام بشكل مسبق و تفريزه و تجهيزه على السوا أو غيرها من الأفكار للعصائر و السحور كثيرة و منتشرة على الكثير من المواقع و مفيدة فعلا.
و لكن الخطوة الأهم من ذلك هي تحديد خطة الوجبات لهذا الشهر الكريم:

1- حددي كام يوم هنجهزي فيهم أكل لأن ممكن يكون في أيام ثابتة او عزومات معتادة مش هتحتاجي تجهزي لها أكل.

2- حددي الأصناف اللي ناوية تطبخيها إن شاء الله حتى لو مش هتقدري تشتري كل مكونتها أو تجهزيها كلها بشكل مسبق.

3- و نفذي طبعا مفس القائمة للسحور لو انتم من النوع اللي بيحب ينوع... لو سحوركم ثابت حددي الاصناف و كمان كمية كل صنف بحيث تقضيكي خلال شهر رمضان.

4- متنسيش تحددي كمان العصائر و السناكس خصوصا للاطفال و ليكي لو هتاخدوهم معاكم للصلاة او تكون كوجبات خفيفة بين الإفطار و السحور.

5- حاولي تجهزي كل حاجة ممكن تتخزن و تتفرز و تكون جاهزة على التسوية لأن دا هيوفر لك وقت كبير جدا في رمضان.

و اهم حاجة إنك حددتي خطتك فأصبح المكونات و الاحتياجات واضحة أمامك إن شاء الله.

و دي صور لبعض الأفكار من صفحة دكتورة حنان عمران جزاها الله عنا خيرا 

ثالثا الأطفال:

أفضل حاجة تخليكي تستفيدي بوقتك مع الأولاد في رمضان و تستثمريه و كمان تقدري توفري وقت و مجهود التحضيرات... إنك تحطي خطةو تصور لأنشطة مسلية و جميلة ممكن تشتغلوها في وقت محدد يوميا في رمضان... و يا سلام لو ارتبطت بالتربية الإيمانية للأطفال خلال شهر رمضان... طبعا طباعة الأنشطة و تجهيزها هيوفر لك وقت كبير في التحضير و الطباعة و التجهيز و غيره... و لكن دا مش معناه تملي كل وقتهم بالأنشطة دي... اللعب الحر مهم و مطلوب حتى في رمضان :)

و أوعي يفوتك مقال التربية الإيمانية لأطفالنا في رمضان لأستاذتنا مروة الحبشي:

http://israazain.blogspot.com.eg/2018/04/blog-post_21.html


رابعا العبادات:

العبادات كمان محتاجة خطة... انتي لو رايحة خروجة بتخططي لها... ما بالك برمضان و خير رمضان... حطي لنفسك روتين و اوراد ثابتة... استغلي وقت المواصلات أو السواقة او المطبخ أو التنظيف في عبادة و زي الأذكار أو سماع القرآن... و متنسيش تشوفي جدول العبادات اللي اقترحناه علشان نسهل عليكي متابعة العبادات في الموضوع هنا:

نسخة pdf لجودة الطباعة:

https://drive.google.com/file/d/1Xs6PxLUKPktOQQyxMt5Qd9TKsgqgNn3d/view

أو الصور هتلاقيها على صفحتنا هنا:

https://www.facebook.com/israa.zain.owmm/photos/a.525762160923869.1073741828.498073473692738/948645935302154/?type=3


خامسا صحتك:

من اكتر الحاجات اللي بتهدر الوقت هو إنك تكوني بتأدي مهامك بخمول و تعب... لأنك بتاخدي وقت أطول في المهام و دا بيتعبك اكتر و هكذا... فالاهتمام بصحتك هيخليكي أكيد كلك نشاط و حيوية و هتنجزي بشكل أسرع و بكفاءة اعلى.

و اكيد مقالات الأسبوع الصحي هتفيدك و انتظري المزيد في مقالات هذا الأسبوع من ملفنا الرمضاني.

صحة أسرتك في رمضان- الجزء الأول

http://israazain.blogspot.com.eg/2018/04/blog-post.html

صحة أسرتك في رمضان- الجزء الثاني

http://israazain.blogspot.com.eg/2018/04/blog-post_17.html


و دمتم بخير
إسراء زين